Klagtes van beweerde kinderarbeid teen boer ondersoek

[OPVOLG] Die departement van arbeid het intussen gesê altesaam 53 kinders is van plase in die distrik verwyder. Lees die opvolgberig hier.

Argieffoto

Die Valke het ʼn ondersoek van stapel gestuur nadat bewerings vandeesweek aan die lig gekom het dat ʼn boer van die Wesselsbron-gebied in die Vrystaat glo minderjariges as seisoenwerkers op sy plaas gebruik.

Volgens die bewerings laat die boer jaarliks seisoenwerkers uit Noordwes kom om gedurende oestyd op sy plaas te help om mielies op te tel op lande wat gestroop is. Daar word beweer dat die boer vanjaar minstens 23 minderjarige kinders in sy diens gehad het.

Verskeie ander aantygings is ook teen die boer gemaak, insluitend dat die werkers in haglike omstandighede op sy plaas moet leef, dat hy hulle minder as die minimum loon betaal en dat hulle vrot vleis gegee is om te eet.

Mildred Oliphant, minister van arbeid, het intussen in ʼn verklaring gesê minderjarige werkers is op twee plase in die Wesselsbron-gebied geïdentifiseer. Sy het gesê die 23 kinders wat in samewerking met die departement van maatskaplike ontwikkeling van die plase “gered” is, is na ʼn plek van veiligheid geneem. Alle werknemers is egter van die plase verwyder.

Die departement van arbeid het in ʼn verklaring gesê sommige van hierdie seisoenwerkers is nog nooit betaal sedert hulle op die plase begin werk het nie en ander het net gedeeltelike betaling ontvang. “Die departement van arbeid werk sedert Maandag onverpoos om die klagtes van die 181 seisoenwerkers af te neem,” lui die verklaring.

“Werkers is in kennis gestel van die gesondheidsrisiko’s waaraan hulle blootgestel is en die maatreëls wat die werkgewer moes instel om daardie risiko’s te bestuur. As gevolg daarvan is alle arbeid op die plase summier stopgesit. Die verskriklike, gevaarlike en onmenslike omstandighede waaraan hierdie werkers blootgestel is, het samewerking tussen die relevante regeringsdepartemente genoodsaak. ʼn Gesamentlike operasie tussen die departemente van arbeid, binnelandse sake, menslike nedersettings, maatskaplike ontwikkeling en die SAPD is aan die gang gesit.”

Die departement het gesê na aanleiding van hierdie beweerde oortreding van verskeie arbeidswette word inspeksies nou op al die plase in die gebied gedoen om te verseker dat boere geen soortgelyke oortredings begaan nie.

Brig. Hangwani Mulaudzi, woordvoerder van die Valke, het aan Maroela Media bevestig dat die bewerings deur die Valke ondersoek word, maar het gesê daar moet nog met alle rolspelers betrokke vergader word voordat hy meer kommentaar kan lewer. “Daar is prosesse wat gevolg moet word en al die nodige rolspelers moet in kennis gestel word van die pad vorentoe. Ons sal volgende week meer oor die saak kan sê,” het hy gesê.

Die boer teen wie die bewerings gemaak word, het Maroela Media se navrae na sy regsverteenwoordiger verwys. Sy regsverteenwoordiger het Donderdag aan Maroela Media gesê hy kan nie in dié stadium enige kommentaar lewer nie. Hy het wel bevestig sy kliënt was teen Donderdagmiddag nog nie aangekla nie.

Enjoyed this post? Share it!

 

Leave a comment