Afrikaanse sanger en sy bulletjies kry TV-reeks

Jay du Plessis en sy seuns (Foto: Twitter via CO Productions)

Die Afrikaanse sanger Jay du Plessis en sy vier seuns is binnekort in ʼn splinternuwe werklikheidsreeks op VIA te sien.

Corné Oosthuizen, die sanger se agent, het gesê dié reeks, wat Jay en die boys heet, beloof om ʼn persoonlike blik op Jay weg van die verhoog af te gee.

Dié werklikheidsreeks volg die sanger en sy seuns waar hulle in elke episode ʼn uitdaging aanpak soos om onder meer ʼn kaskar of boomhuis te bou en sluit volgens Oosthuizen ook “lesse oor ouerskap” in elke episode in.

“Die meeste van Jay se aanhangers ken hom as die verhoogpersoonlikheid en som hom op as iemand wat onder meer hou van kuier. Jay en die boys gaan ʼn eerlike blik op hom bied: sy liefde vir sy gesin en sy passie vir ouerskap. Dit gaan aan hom dimensie verleen en aanhangers selfs nog liewer vir hom maak,” sê hy.

Groot dele van die reeks is by die sanger se huis verfilm terwyl sommige episodes op ʼn plaas in die Vrystaat geskiet is.

“Dit is ʼn gesinspoging,” sê Oosthuizen. “Al vier sy seuns en sy vrou is in die reeks te sien. Dit is baie opwindend en ons kan nie wag vir aanhangers se terugvoer nie.”

Die laaste dele van die reeks word in September klaar verfilm.

Jay en die boys is vanaf 19 September om 21:00 op VIA, DStv-kanaal 147, te sien.

Enjoyed this post? Share it!

 

Leave a comment